程式交易；無論你有幾多策略、幾多手法、幾多目標都好，作為小散戶首先就係要搵一間(或多間)可以幫到自己既證券行；尤其係要做程式交易既香港人，如何選擇一間香港證券行做程式交易真係令人頭痕。
呢篇文唔會幫任何一間證券行賣廣告，但市面上的確有啲行係比較好既。呢度只係紀錄我既心得，方便我日後想轉另一間行去交易時唔駛從頭來過(雖然都係會重新搜集資料再檢視一次)。
找證券行之前首先要清楚知道自己有咩要求，我亦順便在此吐下苦水，以我為例：
1) 有(給散戶的)程式交易服務，呢個當然係首要啦，剩係呢項已經可以將全香港幾百間證券行的一大部分篩走踢出選擇範圍。唔好以為香港係金融中心就咩金融服務都有，呀唔係，其實真係咩服務都有，但大部分高階或等殊服務都只係向有錢人開放，程式交易服務就係一例。一間行唔會為左賺散戶雞碎咁多既手續費而額外花數以萬計既錢冒風險去改自己既交易系統，仲要請一批電腦人、又要搵供應商拉線、又要買配套、又要請風控、又要搵中介商、又要培訓一堆客服……等等，隨時散戶人數唔夠每個月要倒貼錢。就係咁隨著程式交易開始普及，需求人數多資金多，而且證監會和港交所亦「間接鼓勵」既情況下，所以最近兩三年開始出現大量證券行將自己公司本身有既程式交易服務對外開放服務。亦因為咁，貝閃從6年幾前起由每間拍門摸門釘到現在只是需要問對方支援那款交易程式便可，方便好多。
2) 搵到之後自然問對方支援那種程式交易。程式交易平台有好多，例如C++、Excel、MetaStock、Multicharts、Esunny、Python等等，多到可以列表(當然，我真係有做功課有列表)，各有優劣。回憶返以前，如果有散戶(非技術人仕)想做程式交易，首先係要搵到一間證券行肯開放API權限俾你連過去公司伺服器下單既同時又要搵到一間數據公司提供即市數據俾你(港交所係有，貴啫)，另一方面又只限制你用C++、C#或Java去做連結語言及運算(仲要自己諗辦法開Server再加個MySQL資料庫去儲存數據，無計，以前唔興用雲端數據庫)。我呢啲電腦白痴又怎可能識做晒，最衰仲要窮。好啦，近兩年真係唔同晒喇(自2013年港交所改系統大幅支持高頻交易，睇返港交所發表文章就知)，百花盛放，證券行開放API任你連入去既同時那些程式交易軟件亦一齊進化主動支援對外連接包括數據接入及下單輸出。下單種類亦開始多元化(呢點我好重視)。所以現今老散們選定一種程式交易軟件便可開波。
3) 得知證券行支援清單上有自己既程式當然高興啦，但係咪住，呢個時侯又要開始問佢有咩限制喇。無錯，係限制！例如(1)交易種類限制：有無國內外指數期貨？有無貴金屬？有無外匯？有無歐式/美式期權！！！？有無股票同債券？(2)資金限制：開戶戶口有無最低存款限制？有無孖展限制(做期貨期權呢個幾重要，防止港交所臨時改保証金條款而無端端被斬倉)？(3)交易限制：有無每月最低交易次數？有無假期持貨過夜規則？有無即日仙交收結算規則計法？電腦自動下單上限(呢個極重要，你睇美國中國既人造股災就知)？總之間間唔同、次次唔同，隔一段時間又會改，要多注意。其他電腦軟件上既限制反而係濕碎事。
4) 仲有一點要知道先既，就是佢有咩支援服務喇。就好似售後服務咁，順境過陣無咩所謂；去到出事嗰陣真係跪地都無用求救無門。做人手交易可能覺得唔重要，但做程式交易就好重要。例如穩定性(佢實話好要自己做功課)、人手斬倉點做(救命服務)、技術支援、系統教授、接駁操作、模擬帳戶……等。試諗下回憶自己開發同交易嗰陣出現過咩問題：斷線點算？張單落左未？成交左未？系統平唔到倉喎？個市咁快電腦跟唔上，個成交價差咁遠？程式寫錯落錯單點算？點解接駁唔到API既？如何自動回補資料？點檢查倉位數據？點解啲數據源左跳右跳唔合理既啲tick顛左呀？點解系統倉位同真實倉位唔同既明明有落單有成交？點解回傳結果係ERROR？原來間間券商有各自命名既交易編號架仲要個個月唔同點動態更新有無清單？淨係得DDE咋？吓！原來間行API唔支援”冰山單”架？出左指令唔等於掛左單排隊架(如時段限制，或下單代存，或未到觸發)？例子多不勝數，唔想係咁，自己多做功課多思考。
5) 到取後一項亦是最重要的一項，就是手續費。當然係愈低愈好啦，呢個項目要留意返同上面咁多因素一齊考慮，達唔到目的幾平都無用；不過貴既亦建議唔好硬住頭皮開戶照做只會白蝕錢，等過多兩年再競爭白熱化多啲先(像貝閃一樣用住Excel開發交易邏輯先羅)，到時一定更平(此時証券行既成本都更平)，美國台灣就係實例。另外有其他收費必須問清楚，始終程式交易的開放只係得幾年時間資訊少透明度低。例如有無收月費、持倉費、交易佣金、按金、用百分比計定固定數計、每次最低收費……五花百門既收費最恐怖，有時寧願貴啲都想揀間收費明確既(成本支出容易轉變為程式碼寫入資金管理程式內)。另外有些証券行有增值服務：例如免費接駁測試、免費/收費數據(呢項重要)、每日電子結單(極重要，即日核對系統有無下錯單)、特殊下單功能、孖展服務(建議先開左然後永世唔用)、免費顧問服務、VIP服務、高頻交易收費計劃…..等。作為散戶拿住幾萬蚊想測試下，其實可以選擇既又唔係好多，手續費都會蝕死更要小心。
以上每一點都足夠做一單清單出黎定期更新！之後有機會再係Blog度做記錄。
點解開Blog我要第一篇就寫呢啲野？仲要打到水蛇春咁長去吐苦水呢？因為我估計咁多證券行開得呢個服務就一定要爭取足夠既客源先頂得順營運。佢地既市場研究部一定會上網搵料，呢篇野就係比佢地睇既。爭客方法其實唔多，佣金多少基乎係致命一擊；但係佣金鬥到無得再鬥時，佣金之外仲有咩呢？啲程式交易外行人同資金少既老散仲會考慮啲咩面對啲咩就變成服務質量比拼指標。間行解決到幾多問題就有幾多客就可以比人收貴啲啲，相信呢篇文章出街後可以提供一個改善方向，最後有雙贏局面：散戶享受服務多元化，券行多左入門客群搶佔有率。
貝閃
2016/07/07 15:00